Asociación Cultural “Vagalumes” amosa o seu pesar polo falecemento de quen tanto traballou e loitou pola nosa lingua e cultura: Xosé Neira Vilas

Desde a Asociación Cultural “Vagalumes”, xunto coas demais entidades que constitúen a Federación de Asociacións Culturais “Galiza Cultura” queremos sumarnos ao pesar que o mundo da nosa cultura ten hoxe pola perda dun dos seus máis sobranceiros representantes. Como creador, investigador e divulgador das nosas letras estivo constantemente dedicado con todas as súas enerxías a que soubéramos máis de nós, que quixéramos e valorásemos o propio, e que estivéramos orgullosos da nosa historia e do noso pobo. 
Desde o activismo cultural queremos subliñar a súa colaboración co asociacionismo de base, a súa constante disposición a conferenciar, aconsellar ou iluminar as entidades culturais do noso país no necesario labor que estamos a desenvolver.
Na Estrada lembramos especialmente a súa presenza continua nos centros de ensino, nas actividades culturais, nos certames e nas súas colaboracións coa revistas locais. 
Xosé Neira Vilas, nunca renegou da nosa lingua e cultura, nunca dimitiu de galego e achegou toda a súa intelixencia e creatividade para que o noso idioma florecese e brillase con máis esplendor.
Neira Vilas deixanos, mais Balbino queda, e queda toda a súa inmensa e esclarecedora obra, de tal xeito que dalgunha maneira segue a vivir nela e como tal o sentimos todos os que queremos o que el tanto quixo: a nosa lingua, a nosa cultura, a nosa patria, Galiza.