HOXE A VOLOS DOUS

David Otero

Manuel García
Manuel Sueiro
Velaí dous máis nesta campa.
Velaí dous nosos de moito para máis.
porque así…máis seremos no camiño.

Camiño el…vocacional e militante
indo por flores de viva primavera
sendo vós… Manuel, Manuel,  
e así nós tamén sendo… a pasos de sumando obra
neste lugar onde non se gardan esquencidos

O voso acento, Manuel, Manuel, éo de… “si…aquí”
e aquí si hoxe…nós  pintamos a bandeira
coas colores propias das nosas palabras
retendo arcos da vella nas meniñas dos nosos ollos
acoutando pois… que a casa nosa e vosa…non se nos marche pola porta.

Manuel, Manuel, que así ben vos acae a certo o de…
“ que alí onde se toque…a memoria doe…”
por iso  a necesidade da vosa presenza nesta Campa
que nela vós...
xa non sodes presentes ausentes…

Logo velaí pois …dúas opcións …”a vida…ou a vida…”
que así con ela celebremos a memoria
porque  , Manuel, Manuel…nada vén do baleiro
que  a beleza nace da terra
e por iso as nosas palabras… levan historia.

Manuel, Manuel,
na Irmandade  desta Campa viva das Laudas
nesta fronte de restauración
brademos memoria…
Non lle botemos máis silencios

…ao silencio.