<![CDATA[TABEIROSMONTES - Santa Cristina de Vea (Santa Cristina)]]>

Aquí vai unha pequechiña contribución á toponímia de Santa Cristina de Vea, na ubicación de A Costa, dun rego ou suco que xa non leva a auga, pero queda a presenza da súa ausencia, que diría Heidegger, no nome que aínda hoxe perdura alomenos na mente dalgún veciño.
Denomínase así un pequeno rego ou suco feito na terra, que acaba nun balo de terra con dúas pedras horizontais, onde se nos dí que ían a beber os animais; está situado en A Costa na parroquia de Santa Cristina de Vea. Hoxe en día xa non ten auga. Segundo a miña investigación no Arquivo Histórico Universitario de Santiago, procede este nome da súa pertenza a unha finca dos Barreiro. Un veciño informounos que ao pasar a carretera tamén se chamaba " O Agro dos Barreiro". Un membro destacado desta familia foi Simón Barreiro, de Santa María de Xanza e que tiña unha casa en Santa Cristina De Vea. Foi Barbeiro-Sangrador do Hospital Real de Santiago, e era o avó por parte da nai de Don Manuel Ventura Figueroa Barreiro (1708-1783) o da estatua da Alameda de Santiago, Gobernador do Consello e Cámara da súa Maxestade, Arzebispo de Laodicea, Creador da " Fundación Figueroa ", de dotes para orfas parentes súas para casar ou para que segan carreiras universitarias os descendentes . Para mín foi importante saber deste suco, porque é a pegada real e física no terreo que conecta a ese personaxe histórico coa parroquia, o seu avó materno tiña aí unha casa e este topónimo demostra a existencia das propiedades que tiña Simón Barreiro nese lugar, onde viviron alomenos dous tios de Ventura Figueroa que herdaron de Simón Barreiro .Estes tios foron Don Pedro Barreiro e María Gonzalez, veciños do lugar de Sorribas, e don Manuel Valverde e dona Francisca Antonia Barreira Rodriguez de Prado, pais do primeiro Patrono da Asociación figueroísta, don Juan Bautista Valverde Barreiro ( 1727-1788). Noutro documento do 1699, faise referencia á devandita casa, desta saga familiar.