Xornal de Tabeirós-Terra de Montes

Entrevista ao historiador Dionisio Pereira sobre a censura na investigación da represión franquista

23/6/2019

Fronte a decisión da Universidade de Alicante de borrar os datos dunha investigación na que se cita o nome do secretario xudicial no proceso contra o poeta Miguel Hernández

Dionisio Pereira intervindo na homenaxe ao portugués Manuel Graciano Araujo residente na Estrada no 1936.

-Quen foi o investigado por vostede que desatou o preito? Que lle pedía a familia?:
Manuel Gutiérrez Torres, falangista senlleiro de Cerdedo (Pontevedra), alcalde desta localidade entre os anos 40 e 50 do século pasado. Solicitaba que retirase dun libro da miña autoría unha frase na que constataba a súa participación (sen especificar feitos) nas represalias padecidas en Cerdedo e na súa contorna tras o golpe militar de 1936 e me retractase publicamente. Ao comezo, pedían unha cuantiosa indemnización económica; mais logo retirárono.

-A diferenza da Universidade de Alicante, vostede negouse a suprimir as referencias.
Si, e como dixo hai pouco Jordi Cuixart no Tribunal Supremo, volveríao facer as veces que fagan falta. Porque o historiador non é dono da magoada memoria dos vencidos; só eles están lexitimados para xestionala. Eu só tento transmitila e interpretala á luz das fontes documentais; nunca a amputala.

-Como foi o proceso xudicial? Até que instancia chegou, cantos anos tardou?.
Procesáronme no Xulgado de 1ª Instancia de A Estrada e, logo, na Audiencia Provincial de Pontevedra; os denunciantes decidiron non chegar ate o Constitucional, debido a que a Audiencia de Pontevedra condenounos a pagar as costas do xuízo. En total, algo máis de dous anos. Un pequeno calvario, comparado con outra xente como a documentalista de TV3 Dolors Genovés que botou 10 anos de xulgado en xulgado. O mero feito de ser xulgado, xa é unha condena da que ninguén che repara, e, eles, os denunciantes, sábeno.

-Que argumentaron os xuíces para darlle a razón a vostede?.
A Audiencia de Pontevedra considerou que prevalecía o dereito á investigación fronte o dereito á honra e subliñou que o escrito denunciado era un estudo científico, no que non existía pretensión algunha de atentar contra ninguén. Dende aquela, a sentenza ven sendo un referente na recuperación da memoria dos vencidos, no caso de presuntos delitos contra a honra.

-Que pode supor para os historiadores unha decisión como a da Universidade de Alicante?.
Tomando a cousa con sentido do humor, dáme a mín que, tal e como aconteceu co familiar dos meus denunciantes, o sr. Baena Tocón vai ter unha celebridade que, doutro xeito, non tería. Agora en serio: penso que é moi grave para a liberdade de investigar e o dereito a saber da cidadanía o feito de que unha institución académica censure un traballo científico. Tamén me preguntaría, pensando sempre nas vítimas, se alguén da Agencia de Protección de Datos e do Reitorado da Universidade de Alicante reparou nas recomendacións da ONU verbo do dereito daquelas á verdade, á xustiza e á reparación. Como dixen, a súa memoria, a das vítimas, non debe ser mutilada, e, se hai vítimas, hai tamén vitimarios.

* Con motivo da polémica pola decisión da Universidade de Alicante o xornal El País entrevistou ao historiador veciño da nosa comarca. Desde esta páxina recollemos este treito da conversa poo interesante que pode resultar para a loita polo dereito a verdade no traballo que estamos a desenvolver en Tabeirós-Terra de Montes

0 Comments

III Mostra de Teatro Escolar Olimpio Arca Caldas

18/6/2019

0 Comments

Presentación da III Mostra de Teatro Escolar Olimpio Arca Caldas

CEIP Cabada Vázquez de Codeseda coa obra: "Mamá cabra e os cabritiños"

CEIP Figueiroa coa obra: "Mil anacos"

CEIP Pérez Viondi coa obra: "O Merlo Branco" (adaptación da obra de Cándido Pazó)

CEIP O Foxo coa obra "A Cebra Camila" de Marisa Núñez

IES Manuel García Barros coa obra audiovisual/ curtametraxe "Mutacións"

Colexio Nosa Señora de Lourdes coa obra "O enfermo imaxinario"

Club de lectura "A Carballeira" do IES nº 1, coa obra "A escola no faiado" (baseada na obra "Mulleres bravas" da ed. Urco)

IES Chano Piñeiro coa obra "Pelexa no souto" de Olimpio Arca Caldas.

IES Losada Diéguez coa obra "Vogando nos Soños"

Clausura: Familia de Olimpio Arca

Reportaxe fotográfica

0 Comments

A Chousa de Pedro Bras: o mito fundacional da parroquia de Pardesoa

12/6/2019

0 Comments

Calros Solla

Igrexa e crueiro de Xirazga

En 2013, transitei ás escuras o topónimo “Pardesoa” e, na apalpadela, suxerín a etimoloxía parĭēte sōla (“parede soa”), restos construtivos. En 2015, o estudo de Carolina Pérez Capelo verbo dos topónimos rematados en -oa, -oá, -úa e -uá viría confirmar as miñas sospeitas. Pardesoa é parroquia do concello pontevedrés de Forcarei, lindeira coa de Xirazga, pertencente ao concello ourensán de Beariz. Ambas as dúas, formantes da histórica comarca de Montes. Xirazga (ao sur) e Pardesoa (ao norte) comparten un quilómetro de fronteira. O catálogo de Patrimonio consigna catro gravados rupestres nas inmediacións: o petróglifo do Petón e os petróglifos 1, 2 e 3 do monte Peón, todos catro sitios arqueolóxicos localizados na estrema entre Pardesoa e Presqueiras (Santa Mariña).
A “parede soa” á que fai referencia o topónimo evoca a existencia dunha antiga construción, illada, selleira, primixenia. Aquelas pedras primeiras chamáronlle a atención a quen, de segundas, se estableceu nestes predios e logrou subsistir tirando proveito das bondades da natureza. Ben seguro, os colonos recén chegados pensaron: “Aquí xa viviu xente antes ca nós”, e aquela arquitectura derruída inspiroulles o nome do asentamento.
Cando abalamos na árbore das orixes, unha peza de froita acábanos levando a outra. Quen non anda tras da resposta xamais acada a verdade, cando menos, unha das verdades posíbeis. Consonte o recollido días pasados na parroquia de Xirazga, a colonización de Pardesoa e a explicación do propio topónimo poden albiscarse no relato histórico e/ou lendario que flúe límpido da memoria pernal do señor Aurelio Ramos Ogando (91 anos), veciño do lugar de Alén (o señor Aurelio di Alén e Correa, sen artigo). A “pardesoa” de Pardesoa ben puidera identificarse cos vestixios dunha zarra, casa, pozo e pomar cuxos antigos propietarios eran coñecidos por Pedro Bras e dona Rosa (A Chousa de Pedro Bras, A Casanova, O Pomar de dona Rosa). Pedro, a pedra de alicerce, nome acaído sen dúbida, para asentar a historia e mais a lenda.
Ao parecer, carecentes de acomodo en Xirazga, Pedro Bras e a súa familia decidiron probar fortuna máis ao norte, en Pardesoa, tras as lombas do monte do Ceo. Arroubados polo realismo máxico do señor Aurelio, deixamos ao coidado dos lectores separar a historia do mito, se en algo son desemellantes. A Casanova de Pedro Bras é nestora pardiñeiro, mais sobre as súas ruínas se nos deu por construír a crónica dunha fundación. Fala o señor Aurelio. Escoitemos:
“Esta é a historia dun matrimonio do lugar de Alén. O home chamábase Pedro Bras e a muller andaba por dona Rosa. Pedro Bras non se levaba coa sogra, berraban seguido. O matrimonio púxose só e pedíronlles aos veciños unha porción de monte comunal. Os da parroquia dábanlles unha parcela, si, pero por vida deles, non pola eternidade como pretendían. Así que Pedro Bras, incomodado, foi pedir terra a Pardesoa, no outro lado do monte. A sogra despediuse botándolle unha maldición ao xenro: “Aínda vaias parar onde galo non ouzas cantar nin campás ouzas tocar!”.
En Pardesoa, os veciños asinaron con eles o seguinte acordo: terían ao seu dispor toda a terra que puidesen cerrar en tres días. O matrimonio aconsellouse cun escribán de Garfián, alcumado O Demo, e contratou uns homes que axiña se puxeron ao choio. Traballaron aqueles homes os tres días falados, noite e día: un chito aquí, outro alá, outro alá, outro alá, outro alá..., ata que cercaron pola calada unha extensión grandísima na que cabía unha aldea dentro. Faltaba a sinatura do escribán. E Pedro Bras chamou polo Demo. Chamábano O Demo porque onde se metía el, escusaba de ir outro atrás. Era coma o Maneiro de Carballiño, non sei se lles soa; o Maneiro foi un avogado moi famoso. Cando Maneiro saía á rúa, tremía Carballiño todo; non ía por calquera cousa.
Cumpríronse os tres días e dixeron os de Pardesoa: “Vamos mirar a ver o que fixeron os homes”. Cando miraron todo aquilo, botaron as mans á cabeza, pero xa era tarde. Eles cedíanlle un anaquiño de terra, unha veiga pra facer unha casa. Cando chegaron e viron aquela extensión do demo... Alí caben ben estes catro lugares [A Abeleira, Framia, A Correa e A Alén]. Chegou o escribán, só faltaba a firma del, que a firma dos de Pardesoa xa a tiñan: “Yo como escribano doy fe”. Así foi como quedou a chousa de Pardesoa en propiedade do matrimonio ese.
Tiveron tres fillos: dous fillos e unha filla. Os fillos, un chamábase Pablo e outro Salvador. E houbera unha guerra moi grande, e por non ir a guerra, os mozos escondéronse entre os penedos que hai por alí. A nai leváballes a porcelana do caldo e mais un anaco de pan debaixo do mandil e ía coma quen chamaba por un becerro: “Cuxiño toma, cuxiño toma!”, e facía que choraba polos fillos: “Ai, Pabliño, Pablo; Salvador meu fillo; ai, Pabliño, Pablo; Salvador meu fillo; cuxiño toma!”. Deixáballes a pota do caldo e mais o pan e ela volvíase prá casa. Pero, se coñece que unha noite llelos pescaron e tiveron que ir prá guerra. Non se sabe se fuxiron lonxe pra non volver ao ermo da Chousa ou se morreron na guerra; nunca máis se soubo deles.
Despois tiveron unha filla. Chamábase Petronila. Un día, veu un cazador rico, moi rico, de alá de Beariz. Montado de a cabalo, cos dedos cubertos de aneis de ouro, chufábase: “Yo pago contribuciones en las cuatro provincias gallegas”, e pediu a Petronila en casamento. Casaron e levouna pra Beariz. Nese medio tempo, morreulle o marido á señora, alá na Chousa. Tres días, coa gordura de neve que había, tivo o defunto na casa, ela soíña. Tiña tres cans grandes coma cabalos. Deixou dous cans gardando a casa e o outro can tróuxoo con ela. E cunha poleira arrastro pra desfacer na neve as pisadas do can e mais as dela por causa do lobo, veu avisar a xente. Os veciños fóronlle buscar o home. El está enterrado aquí en Xirazga, no cemiterio vello, na Chousa do Cura, e ela está enterrada en Beariz. Ela foi pra onde a filla; ao verse soa, marchou pra onde a filla.
Este matrimonio de Alén conseguiu a chousa en Pardesoa coa trampa do avogado e mais dos chitos. Os homes ían sabidos e traballaron día e noite ata rebentar. A Chousa é de Xirazga, pero está metida na provincia de Pontevedra.
A Chousa de Pedro Bras anda agora pola Chousa de Valboa, porque a herdaron os Valboas. Pedro Bras e dona Rosa non tiveron máis familia. Ela, ao enviuvar, arrimouse ao Valboa Vello de Beariz, que era un homazo, un home de potencia. Arrimouse a el e, cando morreu a Petronila, tamén sen deixar descendencia, os Valboa quedaron coa chousa. A Chousa tamén se coñece como A Casanova”.
O señor Aurelio Ramos enfía un conto con outro; a súa locuacidade daría para encher mil e un domingos. Falando de pedras ben concertadas, saben quen fixo o cruceiro do San Salvador de Xirazga?, pregúntanos. Na opinión do noso informante: o mestre Cerviño de Cerdedo. “Era de Cerdedo ou veu de cara a alá”, explica. Como xa afirmabamos noutro artigo, se esa é a procedencia do canteiro, existen moitas posibilidades de que fose Ignacio Cerviño, o autor do cruceiro do Hío.
O señor Aurelio volve tomar a palabra:
“Voulle contar un caso do Cerviño, que pasou alá en Vigo. En Vigo, na rúa do Príncipe, encargáronlle todas as cornixas dun edificio que se estaba facendo. Cerviño presentouse na obra coma un pobriño, co punteiro aparecéndolle por un lado, o mango da maceta saíndolle polo outro; facéndose o parvo. “A min se me desen traballo...”, rogou o canteiro. O patrón estaba esperando polo mestre Cerviño e non se decatou de que o tiña diante. “Si, si; aquí traballo hai bastante”, aceptou o patrón. “Pero se me puidese poñer unha folla de lata por riba, que a min máncame o sol na cabeza”, pediu Cerviño. “Pois si, home”. O patrón chamou por uns homes e díxolles: “Cravade aí catro estacas e tal...”. Pero cando aquel canteiro empezou: pic!, pic!, case sen levantar a maceta, o patrón botou un xuramento: “Mecá..., vostede é Cerviño!”. “Pois si, son Cerviño”. O patrón deulle un abrazo. “E por que non mo dixo antes”. Cerviño respondeu: “Porque o meu modo de presentarme e este”.
Un silencio inopinado devolveunos á realidade. O tempo pasa amodiño en Xirazga. Non teñas medo de perderte, non...

Parolando en Xirazga co señor Aurelio Ramos

0 Comments

Presentación do libro: “A gran mortaldade” de Calros Solla

8/6/2019

0 Comments

A Asociación Cultural “Vagalumes” convida a asistir o vindeiro venres 14 de xuño, ás 20:30 h. na Galería Dispara da Estrada, preséntase o último libro de Calros Solla. Intervirá o autor xunto coa poeta Elvira Ribeiro.
O seu libro “A gran mortaldade” fálanos do fin do mundo. Cando menos dun mundo, Cerdedo, o mundo rural, a identidade forxada pola sedimentación de séculos de experiencias compartidas. Mais lonxe de axudar a “ben morrer” como pretenden as diferentes relixións e de consolarnos coa promesa de pasar a mellor vida, nesta extrema unción coa que nos bendice o autor non hai lugar á salvación mais si á eternidade a través dun recurso que un pobo suicida foi perfeccionando a través do tempo e que hoxe supón unha das nosas maiores sinais de identidade: rirnos da morte.
Estamos diante dunha obra de arte total que desde o punto de vista literario esténdese desde a narrativa até a poesía e o ensaio, que coas súas ilustracións soborda a escrita para presentar outros produtos estéticos, mais o feito de como é maltratado todo este inxente traballo polo ex-concello ao servizo do cal se fai; representa unha performance no que participan as autoridades pertinentes co seu silencio e coa obscena dedicación a finxir estar vivos que completan o cadro total do que supón a aparición desta publicación.

0 Comments