A Asociación Cultural “Vagalumes” ten previsto realizar a presentación do libro do escritor e investigador estradense Manuel Cabada Castro o vindeiro día 10 de xaneiro, ás 20:30 na sala de exposicións de Novagalicia Banco da Estrada.
Este acto será presentado polo escritor estradense David Otero, e contará coa presenza do propio autor ademais do Director da Editorial SEPT Francisco Domínguez Martínez, e do membro desta editorial e autor do libro “Conversas do P. Seixas”, Silvestre Gómez Xurxo.
O Padre Seixas é unha figura fundamental da nosa cultura en canto promotor da galeguización da igrexa. Manuel Cabada Castro afonda  na biografía desta personalidade e nas súas conviccións achegando luz a Xaime Seixas, e con el a nosa cultura e historia recente.

Desde o 1997 ao 2003 tirouse unha publicación co apoio do Concello da Estrada co fin de difundir a nosa cultura de xeito masivo e popular. Este xornal tiña unha intención divulgativa e inicialmente contou coa colaboración aberta e participativa de escritores e investigadores locais. Foi unha feliz iniciativa que partiu fundamentalmente da Asociación Cultural “O Brado”, mais que finalmente sucumbiu polo uso partidista que quixo facer o goberno municipal de entón co fin de que servise exclusivamente aos fins de propaganda institucional e persoal de quen daquela estaba no poder, colonizando as súas páxinas con retratos do alcalde e concelleiros até que quedou totalmente desvirtuada a intención inicial. Con todo, quedan nas súas páxinas recollidos textos fundamentais para coñecer a nosa cultura. E coa súa completa dixitalización quedarán ao dispor de todos e todas para que teñan oportunidade de afondar nos seus 13 números. Agora podes consultalos nesta ligazón.

O xornal escolar Pereiriños, inspirado o seu nome no célebre certame escolar do primeiro terzo do século XX, xa leva editado máis de 150 números dando conta do dinamismo cultural do CEIP do Foxo. Nos seus exemplares podemos achegarnos a moitos dos persoeiros da nosa cultura que visitaron o centro e a diferentes aspectos do noso patrimonio literario e artística comarcal.
Coa súa colaboración están a disposición de todos e todas na sección dedicada ao seu centro xunto coas revistas que editan e noticias das súas actividades.

Dixitalizada e posta a disposición libre a obra de Xosé Luna sobre Avelina Valladares coa recompilación de textos e poemas realizada por este escritor estradense.
Escribía entón o seu autor no limiar deste estudo fundamental sobre a nosa literatura: "Parafraseando ao máis grande poeta norteamericano, Walt Whitmanl, poderiamos dicir que nas túas mans, amiga e amigo lector, non repousan unhas follas, senón que treme unha muller. Unha muller humilde, sensible, bondadosa, cun espírito libertador e cunha forte dose de rebeldía que a levou -sendo unha señorita dunha das familias fidalgas con máis avoengo de Galicia- a superar os prexuízos existentes e mesturar a súa escrita en castelán cun feixe de poemas escritos en galego, nunha época na que a nosa lingua estaba aldraxada e os galegos tiñan vergonza de falar aos señores como falaban á súa nai ou aos seus fillos."
Esta edición esgotado é posta outra volta ao público nesta versión dixital para consulta de quen queira afondar sobre unha etapa do noso rexurdimento no cal a nosa Comarca participou tamén con voz de muller

A Asociacións Culturais Verbo Xido e Vagalumes apoian o proxecto de Pepe Sendón e a Galería Dispara de traer á nosa comarca a obra de Hodward Zinn, adaptada e interpretada polo propio Pepe Sendón.  A actuación será o día 14 ás 20 horas, no local "Dispara" da vila estradense.

Que nos contaría Carlos Marx se puidese volver ao mundo dos vivos apenas por unha hora? O seu corpo leva 130 anos baixo terra. O seu legado, o marxismo, que durante o século XX inspirou movementos políticos que se estenderon por todo o planeta, é hoxe unha especie en extinción. Desde a caída do Muro de Berlín, o comunismo xa non é un factor na actual ecuación dominada polo monoteísmo neoliberal. Marx está morto. Ou non está morto?

Hoxe protestamos (como fixo Marx) polas barbaridades do capital financeiro (que Marx denunciou) nesta enésima crise sistémica (que Marx prediciu) causada pola acumulación da riqueza nas mans duns poucos (como Marx formulou) nun mundo convulso (que Marx anticipou). E o curioso é que non sabemos quen foi Marx. Cal foi a súa vida, a súa experiencia, a súa maneira de pensar?

Marx está morto. E continúan a matalo todos os días, porque o seu espírito -como aquel espectro sobón que percorría Europa- teima en revivir a cada pouco. Agora din que nunha especie de abdución metafísica, o espíritu de Marx materializouse no corpo dun anónimo cidadán galego bebedor de cervexa. 

Será verdade? Que dirá? Cousa boa non, seguro.