Xornal de Tabeirós-Terra de Montes

Cabanelas contra o espolio e a invasión dos eólicos

25/9/2022

Alarma de Terra de Montes

A asociación Alarma Terra de Montes continua incansábel, despois de charla informativa celebrada o sábado na aldea de Cabanelas, quilómetro 0 do Parque eólico Cabanelas, no día de hoxe continúa a xeira de defensa e posta en valor da terra participando da man do Colectivo do Vento, de Campo Lameiro, na manifestación da cidade da Coruña que convocou á xente do urbano e do rural baixo o lema “O pobo galego contra a depredación enerxética”. Nese sentido, desde a asociación faise chamado a todos os veciños que teñen raíces na comarca, para que espallen a alarma nas cidades nas que viven, asinen alegacións e participen de todas as movilizacións que se convoquen para que esta barbaridade invasiva de destrución e miseria promovida polas empresas, neste caso Greenalia, pero tamén Naturgy, Enel green power, a mal chamada “asociación” eólica galega, etc... desistan de tal atentado contra a vida.
Asi mesmo, e continuando co traballo destes últimos meses, desde a asociación tamén se estará vixiante cos concellos da Estrada, Forcarei e Cerdedo-Cotobade. No caso do de Forcarei, con especial interese, xa que a comisión de seguimento, aprobada en pleno, debería estar convocada antes de finais de semana.

0 Comments

Presentación do libro "A Estrada encantada"

21/9/2022

1 Comment

Mitos, lendas e contos do Concello da Estrada

O venres 30 de setembro ás 20:00 h. terá lugar no MOME, organizado pola AC Vagalumes, o acto de presentación do libro A Estrada encantada. Mitos, lendas e contos, editado pola Deputación de Pontevedra. Intervirán a autora, Clara Iglesias, e María Ortega, deputada do Servizo de Patrimonio Documental e Bibliográfico, Memoria Histórica e Lingua da Deputación de Pontevedra. O acto contará cunha actuación musical a cargo de Anxo Fernández e Gustavo Brea e coa participación de Marcos Borrageros como contacontos.
Para a AC Vagalumes é obxectivo prioritario o coñecemento e valorización do noso patrimonio, tanto material como inmaterial. A mitoloxía popular pertence ao conxunto do riquísimo patrimonio inmaterial do noso país, pero a súa vixencia e transmisión están en retroceso. O mundo labrego tradicional que a sustentaba devece e a última xeración de persoas depositarias e usuarias destes saberes está a desaparecer. Os mitos populares expresan a interpretación que a sociedade labrega tradicional fixo do pasado e da realidade en que vivía e cumpriron unha importante función de cohesión social. Polo tanto, é importante coñecelos, comprendelos e valoralos porque constitúen un elemento significativo da nosa particular concepción do mundo e explican moitas das claves da nosa identidade.
Os mouros e as mouras, os tesouros ocultos, os demos, as meigas, as visións, as ánimas en pena... constitúen unha auténtica mitoloxía popular galega, creada e transmitida polo pobo ao longo de moitas xeracións. En A Estrada encantada a autora prentende facer unha compilación, clasificación e interpretación de mitos e lendas recollidos no noso concello.

Dende a AC Vagalumes recordamos que as persoas asistentes ao acto serán agasalladas cun exemplar do libro.

1 Comment

Sabucedo contra o espolio eólico e a destrución da nosa Terra

17/9/2022

0 Comments

O teleclube de Sabucedo acolleu na tardiña do venres 17 de setembro a continuación das charlas informativas que a Asociación Alarma na Terra de Montes está levando ás aldeas afectadas polo Parque eólico Cabanelas, que está agora en exposición pública, ata o 13 de outubro, e que forma parte dunha arañeira de proxectos que sacrificarían de xeito irreversible o que nos queda de monte e benestar.
A asociación veu de reunirse tamén co tenente de alcalde da Estrada, Xosé Constenla, coa intención de que estes organismos asuman as súas responsabilidades e coñezan o malestar veciñal ante esta situación.
Á xuntanza informativa de Sabucedo estaban convidados os alcaldes de Forcarei e A Estrada, (non foi posible contactar co de Cerdedo-Cotobade), que facendo constar o insulso dos seus compromisos coa veciñanza, nin compareceron.
Ante a gravidade da situación e o atentado medioambiental que suporía a aprobación de calquera destes proxectos, a asociación seguirá esixindo que os concellos cumpran coas súas responsabilidades, de non facelo, seremos testemuñas da súa complicidade coas empresas dos macroeólicos que, faise saber, non serían quen de executar os proxectos sen fondos públicos, no caso concreto de P.E. Cabanelas, por exemplo, consta no proxecto que teñen un capital social inicial de 18000 euros, cando o orzamento executador é de millóns de euros.
Por outro lado, e atendendo á solicitude de veciñas e veciños presentes na charla de Sabucedo a asociación fará máis charlas informativas e ampliará os puntos de recollida de alegacións, aos que se suma o teleclube de Sabucedo, e nesta fin de semana, a Feira da Labranza de Terreboredo e a Feira Labrega de Santiso.

Tarabela de Terra de Montes

0 Comments

Tarabelas pra non ter

14/9/2022

0 Comments

Manuel Cabada Castro

Tarabelas velaí veñen,
coma demos branqueados
pra pousarse en terra nosa.
Veñen cedo, decontado!

Se as deixamos asentar,
non doado nos vai ser
de alí logo as arrincar.
Tempo é xa de nos erguer!

Defendamos logo o noso.
Somos da Terra de Montes!
Non creamos en palabras
que non son de boa fonte.

Parte nosa son os montes.
Rechouchíos de lavercas,
iso si. Rexo NON, porén,
ó zoar das tarabelas!

Ben sabemos que buscades
un proveito que é só voso.
Bo negocio e asegurado,
mais os montes sonvos nosos!

Defendémonos a nós:
terra nosa e o noso estar!
Defendemos os que acougan
e os que a queiran habitar.

Respectamos e queremos
fauna e flora que aquí hai,
bestas, pombos, cantas vidas
onda nós queiran estar.

Non ós monstros e xigantes,
que nos queren atordar.
Son mecanos desalmados
que nos veñen provocar.

Moito disto xa o intuíra
o gran xenio de Cervantes
cando el viu que tralos muíños
se agachaban os xigantes.

No é o vento, meus amigos,
quen do muíño move as aspas.
Poderosos cabaleiros
do diñeiro nel se agachan.

Terra e ceos son gratuítos,
don de arriba e non se merca.
Foron dados pra os coidar.
Non queremos tarabelas!

0 Comments

Circuíto Galego de Teatro Amador no Teatro Principal da Estrada

3/9/2022

0 Comments

Entre os días 9 e 11 de setembro terá lugar no Teatro Principal da Estrada un circuíto de Teatro Amador, promovido polo grupo Disfunción Continua Teatro e organizado pola FEGATEA (Federación Galega de Teatro Afeccionado), coa colaboración do Concello da Estrada. Os Circuítos Galegos de Teatro Amador, nos que se programan representacións teatrais por todo o país, son un dos grandes logros da FEGATEA e cumpren o obxectivo de facilitar a mobilidade dos grupos galegos de teatro amador, dándolles visibilidade.
Para a AC Vagalumes, entidade á que pertence o grupo Disfunción Continua Teatro, é fundamental a posta en valor dos colectivos e agrupacións que traballan na cultura de base, pois levan a cabo un importantisimo labor de dinamización social, achegando o teatro á cidadanía e promovendo a convivencia, a aprendizaxe, a inclusión e a participación.
As funcións do Circuíto realizaranse no Teatro Principal. As entradas estarán á venda na taquilla cun prezo de 3 euros se se mercan de forma individual; tamén existe a posibilidade de prezo bonificado, adquirindo o primeiro día as entradas para todos os espectáculos (agás a obra infantil) a 6 euros.
Programa:

Venres 9 de setembro ás 21:00 h: microteatro

Hipócrita Teatro: Mitoloxía para ignorantes.
Farándula Velutina: Punta tacón.
A Tequerreté: Anónimas.

Sábado 10 de setembro

12:30 h: Andaravía Teatro: Brincacontos (infantil)
21:00 h: Max Teatro: Rutinas

Domingo 11 de setembro ás 19:00:

Teatro do Ar: Porcos do país.

Desde a AC Vagalumes e moi especialmente, desde Disfución Continua Teatro animamos a todas as persoas a achegarse ao Teatro Principal, para non deixar pasar a oportunidade de disfrutar das diversas propostas que nos ofrecerán estes grupos amadores chegados á Estrada desde diferentes lugares do noso país.

0 Comments