Presentamos a terceira edición da Mostra de Teatro Escolar “Olimpio Arca Caldas” que servirá para amosar o traballo que se está a desenvolver nos centros de ensino da comarca nesta materia que tan importante é para o desenvolvemento integral do alumnado, é un medio importante de uso da lingua na súa comprensiva expresividade e equilibrio corporal, ao mesmo tempo que achega ao público en xeral a oportunidade de desfrutar de representacións de calidade feitas con agarimo e dedicación.
As xornadas de teatro celebraranse no Teatro Principal a partir das 18:30 h. durante o martes, mércores e xoves da próxima semana, e estarán abertas ao público en xeral de xeito gratuíto. 

    • Martes, 27 de novembro.

1. CEIP Cabada Vázquez de Codeseda coa obra: "Mamá cabra e os cabritiños"
2. CEIP Figueiroa coa obra: "Mil anacos"
3. CEIP Pérez Viondi coa obra: "O Merlo Branco" (adaptación da obra de Cándido Pazó)
4. CEP O Foxo coa obra "A Cebra Camila" (adaptación de Marisa Núñez)

    • Mércores, 28 de novembro

1. IES Manuel García Barros coa obra audiovisual/ curtametraxe "Mutacións"
2. Colexio Nosa Señora de Lourdes coa obra  "O enfermo imaxinario"
3. Club de lectura "A Carballeira"  do IES nº 1, coa obra "A escola no faiado" (baseada na obra "Mulleres bravas" da ed. Urco)

    • Xoves, 29 de novembro

1. IES Chano Piñeiro coa obra "Pelexa no souto" de Olimpio Arca Caldas.
2. IES Losada Diéguez coa obra "Vogando nos Soños"

A Asociación Cultural “Vagalumes”, membro da Iniciativa Galega pola Memoria, está comprometida coa loita do movemento memorialístico para lograr poder acceder a verdade nestes momentos vedada, conseguir a reparación necesaria das vítimas do fascismo, derrogar a impunidade dos criminais e asentar as garantías de non repetición. Neste sentido é fundamental apoiar proxectos como o deste filme que dá voz aos silenciados, aos que incomodan e molestan aos sustentadores da visión idílica da transición, e nos achega a realidade do réxime actual asentado sobre uns fundamentos que van contra os principios mínimos de respecto aos dereitos humanos, que por moi imprescritíbeis que sexa a súa vulneración, insísten en arrombar como cousa do pasado.
Na Estrada, como no resto do Estado, segue sen saberse a verdade e ocúltase esta a ollos da cidadanía como se fósemos menores de idade. Non se rende o máis mínimo recoñecemento ás vítimas da represión como é o caso da solicitude que o alcalde e a corporación republicana fixo de que se lle dedicara unha rúa. Nin iso se fai mentres se continúa a exaltar aos asasinos dedicándolle a rúa principal do noso concello a un dos seus máis relevantes símbolos (Calvo Sotelo). Por iso celebramos que na nosa vila se dea cabida a iniciativas culturais coma esta que merece todo o noso respaldo.
Facemos, pois, un chamamento para asistir a esta proxección nos cinemas o vindeiro fin de semana (venres 23 ás 17:00 h. e 19:00 h., sábado: ás 19:30, 21:00 h. e 23:00 h., domingo: 17:00 h. e 21:00 h. E durante a próxima semana o luns e xoves ás 18;30).

​https://www.facebook.com/pages/category/Movie-Theater/Minicines-Central-396861087069516/

A Asociación Cultural “Vagalumes” continúa máis un ano a conmemorar o aniversario do polígrafo estradense Olimpio Arca Caldas a quen a nosa comarca e Galiza enteira tanto debe nos diferentes eidos aos que dedicou a súa vida profesional e intelectual.
Para profundar nestas diferentes dimensións temos dedicado xornadas ao seu labor de recuperación do entroido, sensibilización e divulgación do noso patrimonio e de investigación da nosa historia. Neste ano queremos lembrar a súa achega como anovador pedagóxico e para iso contaremos cunha conferencia a cargo do catedrático da Universidade de Santiago de Compostela Francisco Fernández Rei, quen ademais tivo unha fonda amizade con Olimpio Arca.
Francisco Fernández Rei é membro da Real Academia Galega, e desde 1973 forma parte do Instituto da Lingua Galega (ILG). Titula a súa conferencia “Olimpio Arca Caldas: Mestre do pobo e mestre multidisciplinar” e nela tratará de achegarnos o seu estudo sobre a faceta docente deste escritor. 
O acto será presentado pola profesora Maka Arca Camba, filla de Olimpio Arca Caldas, e terá lugar o vindeiro venres 16 de novembro ás 20:30 no MOME (A Estrada).
* MOME (Museo da Madeira e o Móbel, Avda. Benito Vigo, 92A Estrada (San Paio)36680 A Estrada

 É catedrático de Filoloxía Románica na Facultade de Filoloxía da USC.
Como investigador, unha das súas achegas máis importantes foi na área da dialectoloxía; formou parte do equipo de redacción do Atlas Lingüístico Galego, realizado a partir dun extensísimo traballo de campo, despois recollido no Arquivo do Galego Oral. A culminación deste traballo foi a publicación do libro Dialectoloxía galega (1990), resultado de máis de quince anos de investigación sobre a lingua oral. É autor tamén do audio-libro A nosa fala. Bloques e áreas lingüísticas do galego (1996), en coedición con Carme Hermida. Dirixe o Arquivo do Galego Oral. Sen dúbida, Francisco Fernández Rei é a principal autoridade en dialectoloxía da nosa lingua.
Como filólogo romanista, o seu interese céntrase no estudo histórico das linguas románicas; e ese interese vai máis alá do estritamente lingüístico, posto que se ten ocupado da análise da situación sociolingüística que algunhas destas linguas sofren; en particular, ten investigado sobre as linguas minorizadas que se falan en Italia (moi especialmente o sardo) e tamén no Estado Español; de feito, forma parte do Consello d´a Fabla Aragonesa. Foi coeditor de Estudios de sociolingüística románica. Linguas e variedades minorizadas (1999)
Con respecto á nosa lingua, centrouse en problemas de normativización, na construción do estándar e na problemática do galego estremeiro, en particular, na situación do galego de Asturias. Forma parte da Mesa prá Defensa del Galego de Asturias. Ao longo da súa traxectoria como investigador e docente, demostrou sempre o seu decidido compromiso coa normalización da nosa lingua. Participou en distintos encontros e congresos sobre o galego e outras linguas románicas minorizadas e ten publicado artigos en diferentes revistas culturais galegas, como A Trabe de Ouro, Revista da Filoloxía Románica, Cadernos da Lingua ou Grial.