A Asociación Cultural "Vagalumes" e a asociación ecoloxista cultural "Verbo Xido" colaboran coa presentación de "Falando claro". Unha presentación audiovisual de Pepe Sendón con motivo da publicación do seu libro sobre o anarquista de Louro (Muros - A Coruña) Claro José sendón Lamela venres 26 decembro · 19:30 h libraría & galería Dispara · r/ Virxinia Pereira, 4 · A Estrada.
Pepe Sendón, (Lira, 1964) rescata a figura do anarquista de Louro (Muros, A Coruña) Claro José Sendón Lamela (1897 -1937), unha das figuras políticas máis destacadas do anarquismo galego. Falando Claro é unha obra de divulgación histórica froito dunha longa investigación que comezou cando o autor descubriu, nunha enciclopedia, un breve perfil biográfico de Claro Sendón escrito polo historiador Dionisio Pereira. A partir dese momento iniciou unha procura tratando de seguir o rastro dunha vida trepidante e localizar unha produción escrita dispersa e difícil de encontrar.
O resultado desa procura publícase agora nun libro que é a reconstrución dunha peripecia vital novelesca e, ao mesmo tempo, a primeira escolma publicada do traballo xornalístico de Claro Sendón. A obra inclúe tamén unha serie de fotografías inéditas do protagonista.
Pepe Sendón (Lira, 1964) é escritor, músico e tradutor. A comezos dos noventa foi un dos activos promotores da sala NASA e o grupo Chévere e colaborador en numerosos proxectos musicais con Fran Pérez, Narf, como a ópera Annus Horribilis, o grupo A Psicofónica de Conxo ou o multimedia infantil O Labirinto dos Soños. Ultimamente ten publicado a novela Satélite (2010), a obra infantil Animal Fun (2014) con Fausto, e xira co monólogo Marx no Soho e a presentación audiovisual de Falando Claro.

A Asociación Cultural “Vagalumes”, no 45 aniversario da morte de Virxinia Pereira, queremos lembrar á compañeira de Castelao coa que compartiu as vicisitudes e os ideais da súa vida. Imos achegarnos a esta estradense senlleira apoiándonos no traballo de recuperación levado a cabo por Olimpio Arca Caldas.
Con este acto comezamos unha xeira que durante este ano renderá homenaxe ao polígrafo que nos vén de deixar recentemente e ao cal o noso concello en particular e toda en Galiza en xeral está en débeda polo labor de restauración da nosa historia, anovamento pedagóxico e defensa da nosa lingua.
Olimpio Arca destapou a biografía silenciada de mulleres como Virxinia que completan a nosa historia e sen as cales quedaría parcial e fragmentada a comprensión do noso pasado.
O próximo martes 23 de decembro levaremos a cabo un acto de recordo de Virxinia ás 20:30 h. Na sala Varela Buxán do Teatro Principal da Estrada. Intervirá Maca Arca (mestra e filla de Olimpio Arca) e  Noni Arauxo (mestra e persoa que tratou persoalmente a Virxinia Pereira). Presentaremos neste acto a publicación dixital dunha sección da páxina www.tabeirosmontes.com dedicada a Virxinia e dos traballos de Olimpio Arca que irán progresivamente difundíndose a través da web.