Presentación de "A vida incerta, biografía de Virxinia Pereira"

A Asociación Cultural “Vagalumes” presenta o libro de Montse Fajardo sobre Virxinia Pereira. Esta obra,  editada polo Concello de Pontevedra, na que colabora a nosa asociación, dá conta da vida desta estradense que percorreu o mundo na defensa da dignidade e dos dereitos do pobo galego fronte ao fascismo e a impunidade. Desde o seu compromiso compartido co seu home, Castelao, desde os tempos máis felices ao seu carón na procura do recoñecemento do noso país, até as situacións máis duras na guerra e no exilio, Virxinia deixou pegada en quen a coñeceu e na súa correspondencia, o que permitiu á autora deste traballo reconstruír o pensamento e a loita desta muller intelixente e combativa que quedou invisibilizada durante décadas e que hoxe se recupera para completar a comprensión do noso terríbel pasado recente e a explicación do porqué do noso presente insatisfactorio.

O acto celebrarase o vindeiro venres 18 de setembro ás 20:00 h. na praza da Música (á beira do Mome), A Estrada. con aforo limitado e cumprindo os protocolos esixidos pola actual situación sanitaria. Intervirá a autora Montse Fajardo. Esta presentación será retransmitida en directo en streaming a través de facebook na páxina https://www.facebook.com/tabeirosmontes/live/

Previamente, ás 19:00 h. convidamos a asistir a ofrenda floral e lectura de textos de Otero Abelleira e Virxinia Pereira que terá lugar no cemiterio da Estrada para lembrar a estas dúas personalidades da nosa historia e cultura que durante esta semana, con motivo do centenario de El Emigrado e a presentación deste libro, son protagonistas das actividades da nosa entidade.